ANTONANDRIA CUCCA
Ossesu, ma nàschidu in Tathari, de sa leva 'e su 1870, est ‘istadu unu ‘e sos cantadores de pius fama e de pius dura subra sos palcos.
Faghen parte 'e contos e paristòrias sas dispùtas suas cun Gavinu Còntene pro una bindighina e annos e pius puru, ma sun restadas in s'ammentu 'e sos cumpanzos sas proas de sustanzia madura in tota sa carriera 'e custu cantadore geniosu. Cun Antonandria Cucca - e cun Moretti e Còntene - est pigadu sa prima 'orta a unu palcu Barore Sassu, cun Antonandria at cominzadu a cantare Remundu Piras, cun Antonandria at connotu a primarzu sa piata Barore Budrone, cun Antonandria an cantadu pro una barantina 'e annos sos menzus poetes de palcu e totucantos l'an semper mentuadu cun ammiru.
Sa chi sighidi est una 'e sas bessidas pius famadas de Cucca contras de Gavinu Còntene:
Canta pulidu e seriu, Gavinu,
pensa ch'as abbojadu a Antonandria
ca si che torro un'ateruna 'ia
innanti chi t'ingullat su terrinu;
at a currer su samben a traìnu
a sa disisperada in-d-ogni via.
S'Antonandría che torrat pro te
'enis soldadu rasu sende re.
Totu sos chi l'an pratigadu naran chi teniat una 'oghe 'e meraviza, una presenzia distinta, una vena bundante meda chi podiat fagher proa in cale si siat argumentu. E su tema in podere sou figuraiat cun pius braga 'e su normale ca isse fut bonu a b'aggiangher su géniu, s'ammaju 'e su comente, chi li daiat pius ermosura.
De sos ch'an istrinadu prendas a sas piatas sardas in seros de muta ona, Antonandria est unu 'e sos chi pius si dian poder chensciare de bi che las aer leadas su 'entu 'e s'isméntigu, si che 'ogamus sas pagas garas pubblicadas dae ora, e no semper a deghìle, inue custu poete virtudosu no si rendiat mai a niunu mancari esserat in mala muta ca teniat su podere 'e tenner semper alta sa bandela 'e sa virtude sua naturale chi si daiat in bratzos a sa criassione.
Antonandria Cucca morzeit in Ossi in su 1945, sende in s'edade 'e 75 annos.
Paulu Pillonca - Chent'annos: Cantadores a lughe 'e luna.
