NAPULITANAMENTE
'NU PRUGGETTO PE' 'MPARA' 'O NNAPULITANO DINT''A SCOLA
SE CHIAMMA "NAPULITANAMENTE", comme 'sta paggina, 'o pruggetto ca stongo purtanno annanze 'a quatt'anne dint''a scola media "Sogliano" - 'o Rione Vecarìa - addò faccio 'o prufessore 'e lettere.
Chistu "labboratorio 'e lengua e cultura napulitana" fa parte d''o POF 'e 'sta scola e accussì, stuorto o muorto, 'o Nnapulitano è trasùto 'ufficialmente' 'mmièzo 'e materie ca se sturèano.
Pe' chist'anno, 'o pruggetto è cagnato 'nu pucurillo, pecchè 'nce sarrà sulo 'n'ora 'e lezzione a' semmana, aroppo ca songo fernùte 'e lezzione 'curriculare'.
L'anno passato se songo iscritte a 'stu labboratorio 'na ventina 'e guagliùne/òne, ca pe' mmità facevano parte d''a classe mia ('a III D) e pe' ll'ata mmità venevano d''a III B e d''a III C.
'Ncopp''o prugramma 'e chesta attività se prevede ca 'sti sturiènte:
(a) stanno a sentere - oppure leggeno - 'e paggene cchiù 'mpurtante d''a letteratura napulitana;
(b) s'esercitano a leggere e a parlà' 'nu Nnapulitano veràce;
(c) s'imparano a scrivere cchiù mmeglio 'o Nnapulitano;
(d) se 'mparano a traducere 'nu testo napulitano 'n Taliàno e tutt''o cuntrario;
(e) accummenceno a fa' pure 'nu labboratorio 'e scrittura criatìva 'n Napulitano.
'Na vota ca sarrà fernuto 'stu Labboratorio, pe' 'nu tutàle 'e vinte ore 'e lezziòne, come già se facette pe' ll'anne passate, a tuttuquante chille/chelle c'averranno participato sarrà cunzignato 'nu Diploma, pe' certificà' pure 'o livello 'e cumpetenza int''o Nnapulitano parlato e scritto ca isse/esse sarranno arrivate a tenè'.
'Nzomma, me pare ca se tratta 'e 'na sperienza assaje 'mpurtante, ca ce fa' capì' comme s'avess''a fa' p'ajutà 'e guagliùne 'e 'sta Città a nun se mettere scuorno d''a cultura e d''a lengua lloro. 'O Nnapulitano tene ràreche assaje prufonne e pè chesto tenimmo 'o duvère 'e l'addefènnere 'a chi, 'mmèce, vulesse fa' sparì' tutt''e diversità, ca songo vere ricchezze pe' tuttaquanta l'Ummanità.
Int''a 'sti tre anne 'e fatica avimmo avuto 'o piacere 'e cuntà' 'ncopp''o sustegno morale d''a revista " 'A MMASCIATA", ca facette pure n'articulo 'ncopp''o pruggetto e ca, pe' miezo 'e Massimiliano Canzanella, c''a fatto capì cchiù mmeglio quanto è necessario faticà' p'addefennere 'o Nnapulitano e p''o fa' trasì dint''a scola.
Avimmo participato, 'nfatte, pure a 'nu Cummègno cu' ll'ati scole 'e Napule addò se 'mpara 'o Nnapulitano e' sturiente; avimmo 'ncuntrato 'nu prufessore catalano, ca ce parlaje d''a sperienza 'e chesta lengua; avimmo appriparato e miso 'ntriàto 'na bella rèceta 'ncoppa 'a tradezzione 'maggica' 'e Napule (d''a Sirena Partenope 'nzino 'o Munaciello e 'e 'fantaseme' d'Eduardo de Filippo.
Cchiù 'e recente, po', avimmo canusciùto meglio 'o prufessore Amedeo Messina, 'o direttore 'e ll'Istituto Linguistico Napolitano (ILC), e sperammo ca se putarrà faticà assieme, p'addefennere 'o patremmòmio d''a lengua napulitana.
Pure st'anno purtarràggio annanze 'stu pruggetto, c''a speranza ca 'a sperienza d''a scola media "Sogliano" putarrà cagnà' quaccòsa dint''a 'na Città ca s'avess''a 'mparà quanto è 'mpurtante ca nun ce facimmo scippà' 'na lengua overamente unica.
Mo' se parla tanto 'e "salvà' Napule": accumenciammo a fa' quaccosa pure pe'salvà 'o Nnapulitano...!

Ermès FERRARO
Chesta fotografìa fa verè' 'o Maesto Aurelio FIERRO - ca murette quacche mese fa - quanno venette 'a scola media "Sogliano" pe' cunzignà' 'e diplome d''o Labboratorio 'e Napulitano.
Cu "don Aurelio" è muorto 'nu piezzo 'e Napule, nun sulamente pe' chello ca isso facette p''a canzona napulitana, ma pure pe' chello c'ha saputo fa' p''a lengua napulitana.
Chesta foto è 'na manera pe lle dì' grazzie pure p''a simpatia e a disponibbeletà ca isso avette verso 'a "Sogliano", piglianno parte a ddoje spettacule finale 'e 'sta scola.
Basta ca spremmìte 'ncoppa 'o buttòne - oppure scrivìte: www.nap.wikipedia.org - e ve putite cullegà' cu 'a primma 'nciclopedìa 'nfurmàteca scritta tuttaquanta 'n Napulitano. "Na-Wiki" è assaje 'nteressante pe' tutte 'e nnutìzie e 'e 'nformazziòne ca 'nce putite truvà arinto, ma pure pecché è 'na manèra nòva 'e ausà' 'a lengua napulitana.
Nun se tratta 'e canzunette e puisìe, ma se parla 'e scienzia, mmericìna, giografìa e tante piezze d''a cultura cu 'a "C" grande. Chesto vene a pruvà' ca putimmo ausà' 'o Nnapulitano comme 'na lengua ca nun tene nisciuno prubblèma a ce servì' 'a fora d''a cumuniccazziòne perzonale, familiare o cull'amìce.
E allora, ca state aspettànno ? Cullegàteve mommo' cu "Wiki-Na" e facìte 'na speriènza ovèro nova...!
"NUNVIULENZA" è 'n'articulo ca fuje pubbrecato 'ncopp''all'edizzione ingrése 'e WIKIPEDIA ('a cchiù canusciuta 'nciclopedìa 'nfurmatica) e c'aggio vuluto traducere pure 'n Napulitano.
L'articulo, ca spiéca pprenzipie e strumiénte 'e ll'azzione nunviulenta, me pare assaje utele pe' chi vo' capì cchiù mmeglio 'e che se tratta.
Chi tenesse ggenio 'e s''o leggere, basta ca sprèmme 'ncoppa 'o disegno d''a palòmma e se po' cullegà direttamente c''o pìzzo internet: www.nap.wikipedia.org/wiki/puliteca.
(Jenn. 2007)
PE' LEGGERE 'O CUMMENTO C'AGGIO SCRITTO 'NCOPPA 'O BLOG 'E AMEDEO MESSINA (I.L.C.) - WWW.NAPULITANO.SPLINCER.COM - SPREMMITE 'NCOPPA A L'IMMAGENE 'E COPPA.
VISITATE PURE O SITO NUOVO D''O MIO. WWW.ERMETEFERRARO.IT PE' CANOSCERE ATI ARTICULE, CUMMENTE E CITAZZIONE.
E' 'o pizzo web 'e ll' "Istituto Linguistico Campano" - diretto d''o prufessore Amedeo Messina - ca s'occupa 'e tutelà' 'e llengue d''a Campania - 'mprìmmese 'o NNapulitano. L'I.L.C. tène pure 'na revista napulitana 'on line': " 'O puosto". Messina tene pure 'nu "blog" pe' discutere 'ncopp'a sti prubbleme.
'o 'nderizzo è : www.napulitano.splinder.com
www.ilc.it
Inserire testo
Inserire testo
'O tre 'e giugno - adoppo 'a conclusione d''o terzo Labboratorio 'e Lèngua e Cultura Napulitana d''o pruf. Ferraro - 'o Diriggente d''a Scola Media "A. Sogliano" 'e Napule, 'o prufessore Giuseppe SIGNUDI, cunzignàje 'e diplome a 'e guagliune/one d''e ttèrze classe (sezziòne B -C - D) e d''a classe II D, ca participajeno a tutt''e quinnece lezzione e ca superajeno n'esame finale.
'Stu diploma - 'na specie 'e chillo d''a certificazzione d''o "Trinity" pe' ll'Ingrèse...- fa fede ca 'sti guagliune/one sanno overamente parlà' e scrivere 'nu Napulitano "verace" e c'hanno sturiàto pure 'e regole 'e chesta lengua, ca tene a soccia degnità 'e tutte ll'ate.
'E quinnece lezzione d''o Labboratorio "Napulitanamente" so' state purtate annanze sane sane 'n Napulitano, accussì comme pure l'esame finale p''a certificazzione N.V.P.S. (Napulitano Verace parlato e Scritto).
Chist'anno se tenarrà 'o quarto Labboratòrio 'e Napulitano d''a "Sogliano", però afòr''e ll'ore 'e scola. Tutt''e marterì, d''e ddòje 'nfin''e ttrè, accumenciànno d''o quinnece 'e nuvembre, vinte guaglùne/òne d''e classe siconna e terza media faranno n'ata speriénza c''a lengua napulitana.
Pure chesta vota, 'o Labboratorio d''o pruf. Ferraro tene 'o scopo 'e 'mparà' a 'sti guagliune comme se legge e se scrive cchiù meglio chillu Napulitano che isse se credono 'e sapè' parlà'.
Nun se tratta sulo 'e fa' lezzione, ma 'e fa' 'mmaniera 'e fa' capì' ca 'o Nnapulitano nunn'è 'nu dialetto ca s'ann'a scurdà pe' s'imparà 'a lengua 'taliàna, ma n'ata lengua ver'e propia.
Pe c''o ffà' capì' cchiù mmeglio, 'o prufessore Ferraro 'e ffarrà leggere, scrivere e parlà sulo "napulitanamente" - almeno pe' 'n'ora 'a semmàna...- ausànno 'o Nnapulitano pure pe' 'na specie e "giurnale", c'addeventarrà 'o diario 'e 'sta quarta 'sperienza dint''o 'a scola "Sogliano" 'e Napule.
NAPULE NUNN'E' SULO 'NA CITA': è pure 'na "Metropoli", 'na ver'e propia 'rèzza' 'e città gruòsse e piccerelle.
Pe' mettere assieme 'sta "cità metropolitana", 'a Pruvìncia 'e Napule ha fravecàto 'na specie 'e 'felìnia' 'nfurmàteca, c'ha chiammato "RETE CIVICA METROPOLITANA".
Si ne vulite sapè' cchiù assaje, basta ca spremmite 'ncopp''a figùra e ve putite cullegà pe' mmiézo 'e Internèt.
AGGIO VULUTO ACCUMMENCIA' cu' na citazzione 'e Totò, pigliata d''o film addò isso e Peppino De Filippo vanno a Milano e, sentennose furastière, cercano 'e parlà 'na specie 'e frangése...
'O fatto è ca pure 'e Napulitane songo addiventate furastière stesso a Napule. Nun se capisce, 'nfatte, pe' quà' raggione s'add'a fà' 'na specie 'e battaglia cu ll'Istituzione sulo pe' fa' trasì' 'o Nnapulitano dint''e scole e ll'Unniversità, pe' tramente ca ll'ingrése è addeventato 'na lengua ca s'adda'a sapè' affòrza...
"Nojo volevòn savuàr" pecché - pe' vvìa d''a globalizzaziòne - tuttuquante c'avessem'a 'mparà' 'sta lengua, scurdànnoce però 'o Nnapulitano, comme si fosse sulamente 'a lengua vascia, ca serve sulo pe' parlà' cu amice e pariente o pe' scrivere canzone e macchiette...
Diceva 'nu pruverbio antico ca: "'A lengua nun tene osso, ma rompe ll'ossa".
Sarrà pe' chesto ca chi ha vuluto colonizzà' 'nu paese pe' primma cosa cercaje 'e levà' 'a mièzo 'a lengua ca se parlava llòco.
'A globalizzaziòne 'e mo' sta facenno 'a stessa cosa e, comme 'na specie 'e rullo cumpressore, sta scamazzando tutt''e diversità, chelle naturale e chelle culturale, cu 'a scusa d''a mudernità.
Chello ca è certo è ca, dint''a cent'anne, songo scumparze ggià 'nu sacco 'e lengue e, a poc''a vota, ce stammo appriparanno a rummanè' sulo cu' quatto-cinche lengue...
L'ecologgìa d''e llengue, allora, ce fa' capì' ca nun ce putimmo permettere 'e ce fa scippà' pure 'o pparlà, e ca s'add'a truvà modo e manèra pe' scanzà' 'stu guajo.
Nun c'avimm'a rassignà': nun sta scritto a nisciuna parte c'avimm'a fa' a mmèno d''a cultura e d''a lengua nosta.
Tutt''o cuntrario, 'nce stanno legge e persì 'na Dichiarazziòne Unniversale (chella 'e Barcellona) c'addefenneno 'o deritto 'e tutt''e pupulazziòne a ausà' 'a lengua ca è 'a voce stessa d''a cultura lloro.
'Nzòmma, visto ca - comme dice n'atu pruverbio - "a chiagnere 'o muorto so' lacreme perze", verimmo 'e ce movere ampressa p'addefennere 'o Nnapulitano primma ca fa 'na brutta fine, comme è succiesso pe' tanti llèngue, ca songo già scumparze o stanno pe' scumparì.
"Nojo" nun ne vulimmo sapè cchiù 'e 'nu penzièro ùnneco, 'e nu mudello economico ùnneco e nemmanco 'e 'na lengua ùnneca pe' tuttuquante.
S'add'a dìcere chiatto chiatto ca chi scancella 'na lengua sta scancellando 'na civiltà sana, accussì comme chi scancella 'a diversità biologgica sta scancellanno 'o pprincipio stesso d''a vita 'ncopp''a Terra.
E' pe' chesta raggione ca c'avimm'a mòvere, pe' turnà 'a ddà' degnità o' Nnapulitano: ausannolo pe' parlà' ma pure pe' scrivere e pe' 'mparà, pe' pazzià ma pure p''e cose cchiù sserie e p'arraggiunà'...
'E figlie nuòste nun s'ann'a mettere cchiù scuorno d'essere Napulitane e 'e parlà' Napulitano.
Nunn'è na quistiòne 'e localismo e nemmanco 'nu prorìto 'separatista' o 'neo-burbòneco'.
Se tratta, 'mmèce, 'e addefennere 'a libbertà 'e parlà' comme ce pare primma ancora 'e chello ca ce pare...
Nuje 'nce stamme pruvànno. Datece 'na mano.

Ermès FERRARO
'A 'NU PARO D'ANNE me stongo 'nteressanno - comme perzòna ca sturèa 'e llengue ma pure comme ecologgista - 'e chella ca è stata chiammata, appunto, "ecologgìa lenguistica".
'Ncoppa 'o periculo ca menàccia 'a deversetà culturale, e specialmente chella d''e llengue, aggio scritto pur'io quaccosa, ca però nun è stato pubbrecato ancora.
'Nu riassunto 'strittu-stritto' - e 'n Napulitano - 'o putite truvà 'ncopp''o pizzo web 'e l'Assuciazziòne VAS d''a Campania, c''o titulo: "VVOCE AFFUCATE".
--> www.vascampania.org/viewallnewsc/asp
CHELLO CA STA SCRITTO 'NCOPPA 'a fotografia d''o titulo avess'a essere 'a parola d'ordene 'e 'nu Cumùne che vulesse addeventà' 'na cummunità ver'e propia.
Risgrazziatamente, però, pe mo' è cchiù 'n'aùrio ca na cosa reale. Ma pe chi fatica a Napule dint''e servizzie suciàle e pe' l'educazzione è pure quaccosa 'e cchiù.
E' 'nu pruggètto pe cagnà 'sta città 'nzì d''e rràreche, p''a fa' addiventà 'nu posto addò 'e figlie nuoste putessero campà' cchiù meglio e addò se fernèsse 'e "tirà a campà' "...
'Nu pruggetto, pirciò, ca servesse pe' cagnà nun sulo Napule ma pure 'e Nnapulitane, dànnole chella "degnità" ca vene sulo d''a certezza d''e deritte e d''o rispetto d''e duvère.
Napule nun tene sulo necessità 'e assistenza, ma 'e servizzie suciale pe' tutt''a cummunità.
Napule nun tene nisciuno besuògno 'e essere ajutàta dint''e situazzione d'emergenza, ma 'mmèce 'e campà' senza emergenze: regolarmente.
Napule have 'a necessità - casomai - c''a ggente tene cchiù fiducia e cchiù speranza, accumencianno a cagnà' d''e rràreche, senz'aspettà' ca 'e ccose cagneno a pe' lloro.
"Ma nun dà retta, 'nce sta chi ce penza..", cantava 'na vota Pino Daniele.
'A verità, si nun c'imparammo ca c'avimm'a penzà' nuje, nun cagnarrà propeto niente.
I' penzo ca chello ca ll'Ingrèse chiammano "democrazzìa d''e rràreche" (grass roots democracy) putesse addeventà 'na via pe' cagnà 'na città addò addeventa sempre cchiù difficile campà'.
Tutt'e specie 'e inquinamento, 'a fatica mancante, 'na circulazzione sempe 'ncasinata, 'na delinquenza ca pare 'a sola cosa 'organizzata': nun songo cose ca se ponno risolvere "'a via 'e coppa". Tuttuquante avimm'a fa' a parte nuòsta, facenno rispettà 'e deritte ma pure pigliannoce 'e responsabbilità ca c'attòccano.
Napule putesse addeventà' overo 'a meglio Città si sulamente ce facimme capace ca 'e ccose ponno cagnà' si tuttuquante fanno 'a parte lloro.
Napule po' addeventà 'na città 'e pace e cu' 'na speranza p''o futuro sulo si 'e Nnapulitane s'impararranno a ffà' a mmeno 'e ll'assistenza , d''o clientelismo e 'e tutt''e specie 'e "prutezziòne".
Chi fatica, comm'a me, a tant'anne dint''a scola, ma pure pe' 'nu centro suciale e dint'a 'n'assuciazzione ambientalista, 'sti ccòse 'e ssape bbuono...
Napule po' cagnà, ma s'adda fa' capì' bbuòno comme e pecché.
Certamente, attocca 'a ggente ca fanno pulìteca a fa' capì' ca 'nu pruggetto ce sta, però nun lputìmmo lassà' sulo a lloro 'stu duvere.
Napule addeventarrà overamente 'na "Città Suciàle" sulo quanno 'e Nnapulitane addeventerranno 'atture' e no 'spettature' 'e 'stu càgno...
(E.F.)
Chistu cca' 'ncoppa è 'o pizzo-web d''o CUMUNE 'E NAPULE.
Basta ca spremmìte 'ncoppa 'a ll'immaggine e ve putite cullegà' cull'Ammenistrazziòne Cumunàle 'e Napule e cu' tutt''e 'e servizzie 'e 'sta Città.
'Nce sta pure 'na rubbrica speciale 'e 'stu pizzo web ca parla 'e "napulitanetà", cultura e turismo -----------------------------> www.comune.napoli.it/cultura_intro.htm)
Si spremmìte 'ncopp'a l'immaggene, ve putite cullegà' c''o pìzzo-web d''o cchiù 'mpurtante istituto 'e recèrche 'ncopp' 'e llengue 'e tutt''o munno. 'A revìsta d''o S.I.L., ca se chiamma "ETHNOLOGUE" po' essere sfugliata "on line" e 'a scheda ca truvvarrìte - spremmèndo 'ncoppa 'a figùra - parla propetamente d''a lengua "Napulitana-Calabbrèse" . 'Na vota ca ve sìte cullegate, putite pure cercà' tutto chello ca ve 'nteressa 'e cchiù 'e stu pizzo-web.
HOME | ERMETICA MENTE | EDUCATA MENTE | PACIFICA MENTE | NAPULITANA MENTE | ECOLOGICA MENTE | COMUNITARIA MENTE | GRAFOLOGICA MENTE | ABOUT ERMETE | CONTATTAMI