Comminvs
Eminvs
§
Folia Latina
Comminvs | | |
Iliados liber Igraece et latine | ||
Ut codex electronicus, iuxta formam cui nomen est PDF, excipiatur, sat est hanc imagunculam mure (vulgo: mouse) agere.
|
Imago, quae externam paginam ornat, ad exemplum est impressa tabulae quam Jacobus-Aloisius David delineavit graphide et rubrica, aquatis coloribus pinxit, ubi specatare licet Homerum dum carmina sua ad lyram canit. |
Animadversiones paucae | Ut hic liber ederetur, textum graecum adhibuimus qui “Bibliotheca Augustana” eademque electronica continetur, cuius inscriptio est: http://www.fh-augsburg.de/~harsch/augustana.html. Ratio qua characteres componuntur paululum est immutata, ut conformaretur ad huius opusculi genus typographicum, sed textus est omnino ille. Bibliothecae Augustanae moderatoribus gratias agimus singulares. Textus latinus autem depromptus est e “Gallica” bibliotheca electronica (http://gallica.bnf.fr), ubi codex electronicus legi potest ad formam, cui nomen est Pdf, redactus, quo imagines luce expressae continentur libri cui index homeri poetę clarissimi ilias per laurentium vallensem Romanum e gręco in latinum translata et nunc accuratissime emendata (qui Lipsiae impressus est anno mdxii, Melchioris Lotteri typis). Et Gallicae bibliothecae moderatoribus gratias habemus quam maximas. | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 Supra spectare licet characterum texturam in libro unde descriptus est Iliados textus latinus. Liber, qui inscribitur homeri poetę clarissimi ilias per laurentium vallensem Romanum e gręco in latinum translata, impressus est Lipsiae anno mdxii. Ad dextram, notae quibus usus est typotheta. Infra, epistula Christophori Columbi De insulis nuper in mari Indico repertis, impressa Basileae anno mcdxcii.
| Claudius Didymus Dubitatius textum latinum ex imaginibus phototypicis gallicanis (cfr. imaginem ad sinistram) descripsit composuitque in huius libri adversis paginis, prae illis, quae textum graecum perhibent. Operae est pretium animadvertere characterum confertissimam aciem, qui imaginem subiciunt cuiusdam texturae, sicut in Sacris scripturis, quas Gutenbergius anno mcdlvi composuerat. Sed tunc temporis adhuc in cunis erat ars typographica, anno autem quo Iliados versio Vallensis impressa est, non multum a maturitate aberat. Placuit tamen typographo paginas componere tamquam manu scriptas, sicut fieri solebat primitus, eo tempore, quo artis typographicae inventio tacita tenebatur (videlicet, quo maioris venum darentur libri) et characteres delineabantur ut amanuensium imitarentur manum, qui in scriptoriis operam navabant. Saepius verba sunt breviata ope notarum, quarum conspectum infra legere licet. Artificio breviandi utebantur typothetae variis de causis, exempli gratia, si quid in textu esset emendandum, ne tota pagina ex integro componenda esset, sed etiam propterea quod in more erat breviaturis typographicis, quae dicuntur, uti. Vide etiam epistulam (mclxcii), qua Columbus nos certiores facit de insulis in mari Indico repertis quae, cum breviatis verbis abundet, non tam densatam characterum compositionem prae se fert. En igitur notarum conspectum, quibus usus est Melchior Lotterus typographus Lipsiensis:
In hac editione electronica breviata verba sunt ad integritatem restituta. Interpunctiones verborum, aliaque orthographica signa, ut nunc moris est, adhibita sunt. |
|
|---|
Comminus eminus - Kalendis Decembribus, A.D. MMV
